ကရင်ပြည်နယ်သည် မြန်မာနိုင်ငံလွတ်လပ်ရေးရကတည်းက ပြည်တွင်းစစ် မီးတောက်လောင်နေသည်မှာ ကနေ့ထိပင်ဖြစ်သည်။ ခေတ်အဆက်ဆက်ဖြစ်သော ဖဆပလ၊ မဆလ၊ န၀တ၊ နအဖ စသည့်ခေတ်များကို အုပ်စိုးသူ အစိုးရအဆင့်ဆင့် လက်ထက်တွင် ကရင်ပြည်သူများသည် မိမိတို့၏ တောင်ယာစပါးစိုက်ခင်းများကို ဖျက်စီးမှုခံရခြင်း၊ အရွယ်ရောက် လင်ယောင်္ကျားများကို ဖမ်းဆီးပေါ်တာထမ်းခိုင်းခြင်း၊ ကျေးရွာများကို မီးရှုံ့ဖျက်ဆီးခြင်း၊ ကျေးရွာသားများကို မသင်္ကာမှုဖြင့် စွပ်စွဲဖမ်းဆီးရိုက်နှက် သတ်ဖြတ်ခြင်းနှင့် ပေါ်တာထမ်းသူများကို မြေမြှပ်မိုင်းဗုံးရှင်းသည့် ကိရိယာအဖြစ် အသုံးပြုခြင်းကြောင့် ဒုက္ခိတဘ၀ရောက်ကြရခြင်း စသည့် ဗမာစစ်တပ်များ၏ ရက်စက်သည့် လုပ်ရပ်များကြောင့် ကရင်ပြည်နယ်ရှိ ထောင်ပေါင်းများစွာသော ပြည်သူများဘ၀သည် ကျီးလန့်စာစား ဖြစ်ခဲ့ရသည်။

န၀တ၊ နအဖ စစ်အစိုးရလက်ထက်တွင် သာမညတောင်၌ ဆရာတော်ဦးဝိနာယ ပေါ်ပေါက်လားပြီးနောက် ထိုတောင်အနီးပတ်ဝန်းကျင်ရှိ နှစ်ပေါင်းများစွာ စစ်ဘေးစစ်ဒဏ်ခံရသော ပြည်သူများသည် သာမညတောင် ဆရာတော်၏ ခြေတော်ရင်းသို့ တဖြည်းဖြည်းမှီခိုလာကြသည်။ တစ်ချိန်က တောအတိဖြစ်ပြီး လူသူများမကပ်ရဲသော သာမညတောင်သည် ဆရာတော်ပေါ်လာပြီးနောက်ပိုင်းတွင် သာမညတောင်ခြေ၌ မြို့အလား လူနေအိမ်များလာခဲ့သည်။ ထိုနေရာသည် ကရင်ပြည်နယ်အတွင်းရှိ စစ်ဘေးစစ်ဒဏ်ခံရသော ပြည်သူများအတွက် အိုအေစစ်ဖြစ်လာခဲ့သည်။

ဆရာတော်သတ်မှတ်ထားသော သာသနာမြေအတွင်းတွင် နေထိုင်သော သူများကို နှစ်ဘက်သော စစ်တပ်များက ၀င်ရောက်နှောင့်ယှက်ခြင်း မပြုကြပေ။ တခါတရံ န၀တ၊ နအဖ စစ်တပ်များမှ ပေါ်တာဝင်ရောက်ဖမ်းဆီးခြင်း ရှိလာတတ်သဖြင့် ဖမ်းဆီးခံရသူကို ဆရာတော်ကိုယ်တိုင်လိုက်ပြီး ဖြေရှင်းပေးသည်။ သာမညတောင်သို့ မှီခိုလာသော သူများကို ဆရာတော်က စားရေးသောက်ရေးအတွက် သက်သတ်လွတ်အဟာရဖြင့် လိုလေမရှိအောင် ဆရာတော်က ကျွေးမွေးခဲ့သည်။ သာမညတောင်သည် ပြည်တွင်းစစ်ဘေးစစ်ဒဏ်ကို နှစ်ပေါင်းကြာရှည်စွာ ခံရသော ကရင်ပြည်နယ်ရှိ ထောင်နှင့် သောင်းဖြင့် ချီသော ပြည်သူများအတွက် ဆရာတော်၏ မေတ္တာဓါတ်ဖြင့် ငြိမ်းချမ်းရေးဇုံတစ်ခု ဖြစ်လာခဲ့သည်။

န၀တ၊ နအဖ အုပ်ချုပ်မှု အခိုးအငွေ့ကြောင့် စားဝတ်နေရေး ကြပ်တည်းလာသည့်ဒဏ်ကို မခံနိုင်တော့သည့် မြန်မာပြည်အနှံရှိ ပြည်သူများသည် အိမ်နီးချင်းနိုင်ငံများသို့ နည်းလမ်းပေါင်းစုံ ခိုးဝင်ပြီး ရရာအလုပ်ဖြင့် ဘ၀ကို ရပ်တည်ကြရသည်။ ထိုင်းနိုင်ငံအတွင်းသို့ ခိုးဝင်ပြီး ဖမ်းဆီးခံရသော မြန်မာပြည်သားများသည် ထိုင်းနိုင်ငံ လူဝင်မှုကြီးကြပ်ရေးက မြ၀တီသို့ ပြန်ပို့လျက်ရှိသည်။ ထိုသို့ပြန်ပို့ခံရသော အချို့သောသူများသည် (၁၉၉၅-၂၀၀၃ အတွင်း) မှတ်ပုံတင်များ မရှိကြပါသဖြင့် မြန်မာအစိုးရက လက်မခံဘဲ နှစ်နိုင်ငံနယ်စပ်တွင် သောင်သင်ပြီး အတိဒုက္ခ ရောက်ခဲ့ကြရသည်။ သာမညဆရာတော် သက်ရှိထင်ရှားချိန်တွင် ထိုသို့သောဒုက္ခရောက်သူများကို ကိုယ်တိုင်ကားဖြင့် နယ်စပ်မြ၀တီတွင် သွားရောက်ကြိုပြီး ၎င်းတို့ဇာတိမြို့နယ် ကျေးရွာများသို့ ပြန်နိုင်အောင် ဆရာတော်က ထောက်ခံစားရေးပေးပြီး လမ်းခရီးစရိတ်အလုံအလောက်ပါ စီစဉ်ပေးခဲ့သည်။

ထိုသို့စီစဉ်ပေးခြင်းကို သိလာသော ထိုင်းနိုင်ငံအတွင်း အလုပ်လုပ်နေသည့် မြန်မာရွေ့ပြောင်း အလုပ်သမားများသည် ထိုင်းရဲ၏ ဖမ်းစီးခြင်းဖြင့် မြ၀တီသို့ ပြန်ပို့ခံရပါက မိမိတို့ဇာတိမြို့ရွာများသို့ ပြန်ရန် လမ်းခရီးအခက်အခဲရှိသောသူသည် သာမညတောင်သို့ သွားကြပြီး ဆရာတော်က ခရီးသွားထောက်ခံစာနှင့် လမ်းခရီးစရိတ်ကို စီစဉ်ပေးခဲ့သည်။ ဆရာတော်၏ မေတ္တာဓါတ်ကြောင့် မဖိတ်ခေါ်ရဘဲ မြန်မာပြည်အနယ်နယ်အရပ်ရပ်မှ လူတန်းစားပေါင်းစုံ လာရောက်ဖူးမြော်လှူဒါန်းထားသော ၀တ္တုပစ္စည်းများနှင့် အလှူငွေများကို ဘေးဒုက္ခကျရောက်သည့် လူအများအပြားအား ပြန်လည်ကူညီ ကယ်တင်ပေးခဲ့ခြင်း၊ ပြည်သူများ သွားလာရေး လုံခြုံစိတ်ချရရေးအတွက် လမ်းတံတားများ ပြန်လည်တည်ဆောက်ပေးခြင်း၊ ပညာရေးအတွက် ပြန်လည်ကူညီထောက်ပံပေးခြင်းများကို ပြုလုပ်ခဲ့သည်။

ဆရာတော်၏ လူမှုရေးလုပ်ငန်းများနှင့် ကုသိုလ်များ။
ဆရာတော်သည် ဘုရားစေတီ၊ ကျောင်းတိုက်၊ ဇရပ်၊ ဓမ္မရုံ စသည့် သာသနိက အဆောက်အုံများ ဆောက်လုပ်ပေးသည်သာမက လမ်းပန်းဆက်သွယ်ရေး၊ ရေ၊ မီးနှင့် စာသင်ကျောင်းများကိုပါ တည်ဆောက်ပေးခဲ့သည်။ သာမညတောင်သို့ လာရောက်သော သူအပေါင်းတို့ကိုလည်း နေ့စဉ် ဆန် (၁၀၀) တင်း အထက်တွင် ချက်ပြုတ်၍ သက်သတ်လွတ်ဖြင့် ဧည့်ခံကျွေးမွေးခဲ့သည်။ သာမညဆရာတော်၏ သက်ရှိထင်ရှားစဉ်တွင် နေ့စဉ် လာရောက်ဖူးမြော်သူဦးရေသည် (၁၀၀)မှ (၅၀၀)ထိ ရှိသည်။ ရဟန်းသံဃာ၊ သံမဏေနှင့် မယ်သီလ စသည်ဖြင့် အပါးပေါင်း (၅၀၀)ခန့်ကိုလည်း သာမညတောင်တွင် ဓမ္မတရားကို လာရောက်ကျင့်ကြံ အားထုတ်ကြသည်။

ဘားအံမြို့မှ ကော့ကရိတ်တောင် အလယ်တဲထိ (၉၇)မိုင်ခန့် ရှည်သောလမ်းကို ကန္တာရာဖြင့် ခင်းပေးခြင်းအပြင် လမ်းတံတားကြီးငယ် အစင်းပေါင်း (၉၀)နီးပါးလည်း တည်ဆောက်ပေးခဲ့သည်။ လမ်းဖောက် တံတားဆောက်လုပ်ရာတွင် ရပ်နီးရပ်ဝေး ပြည်သူများက လုပ်အားလာလူကြသည်။ ထိုသို့လုပ်အားလူသောသူများကို ဆရာတော်က ထိုက်တန်သော လုပ်အားခပေးသော်လည်း ထိုလုပ်အားခကို မယူကြဘဲ လမ်းခင်းရန်အတွက် အလှူငွေအဖြစ် ပြန်လှူခဲ့ကြသည်။

အထက်တန်းအဆင့်မီ ကော့ကျိုက်ရွာ အလယ်တန်းကျောင်းကိုလည်း သိန်းပေါင်း(၆၀၀) ကုန်ကျခံပြီး တည်ဆောက်လှူဒါန်းခဲ့သည်။ ထိုအပြင် ၀ဲကရင်ကျောင်းနှင့် သာယာကုန်းမူလတန်းကျောင်းကိုလည်း တည်ဆောက်လှူဒါန်းခဲ့ပြီး ထိုကျောင်းများမှ တာဝန်ထမ်းဆောင်သော ပညာရေးဝန်ထမ်းများအား လစဉ် ငွေ (၁၀၀၀)ကျပ်နှင့် ရိက္ခာများကို ကူညီထောက်ပံပေးခဲ့သည်။ အလံတရာ ဆရာတော်ပျံလွန်ပြီး နောက်ပိုင်းတွင် အလံတရာဆရာတော် တည်ထောင်ခဲ့သော အလံတရာပအိုဝ်း ပိဋကတ်စာပေလုပ်ငန်းကို သာမညဆရာတော်က ငွေကျပ်သိန်းပေါင်း(၅၀)ကျော်ကို အကုန်အကျခံပြီး ဆက်လက်ဆောင်ရွက် စေသည်။ သာမညဘေးမဲ့အရပ်ရှိ သာသနိက အဆောက်အအုံ နှစ်ထပ်ကျောင်းပေါင်း (၂၀)ကိုလည်း တည်ဆောက်ပေးခဲ့သည်။

စေတီပုထိုးများဖြစ်သော သာမညတောင်ပေါ်ရှိ ရှေးဟောင်း မြစောညီနောင်စေတီ၊ မြ၀တီမြို့ရှိ ရွှေမင်းဝံစေတီနှင့် မိကျောင်းကုန်းစေတီ၊ အလံတရာစေတီ၊ အိန္ဒုရွာ ဘုရားကြီးစေတီ စသည်စေတီများကို ထီးတော်သစ် တင်လှူခြင်း၊ ဇွဲကပင်ဆံတော်စေတီကိုလည်း ဘက်စုံမွမ်းမံပေးခဲ့သည်။ မဟာဒုတ် မဲပွဲသို့ သံဃာ ပါးပေါင်း (၅၀၀၀ မှ ၇၀၀၀) ထိ ကြွလာသော ရဟန်းသံဃာများအား သင်္ကန်း၊ ထီး၊ ဖိနပ်၊ ယပ်နှင့် ၀တ္တုငွေ (၁၀၀၀) ကျပ်ကိုလည်း ကပ်လှူ၍ နှစ်စဉ်ပြုလုပ်ခဲ့သည်။ ရန်ကုန်သို့ ရွှေတိဂုံစေတီတော်ကို သွားရောက်ဖူးမြော်ချိန်တွင်လည်း ရွှေတိရုံစေတီတော်အား ရွှေသင်္ကန်းလှူဒါန်းရန် ငွေကျပ်သိန်းပေါင်း (၁၁၀)ကိုလည်း လှူဒါန်းခဲ့သည်။

ဆရာတော်သက်ရှိထင်ရှားချိန်တွင် မြန်မာနိုင်ငံ၌ သြဇာကြီးမားသည့် ဗိုလ်ချုပ်ကြီးခင်ညွန့်က ဆရာတော်ကို လာရောက်ဖူးမြော်သလို အမျိုးသား ဒီမိုကရေစီ လူထုခေါင်းဆောင် ဒေါ်အောင်ဆန်းဆုကြည်လည်း လာရောက်ဖူးမြော်ခဲ့သည်။ ဆရာတော်သည် ဗိုလ်ချုပ်ကြီးခင်ညွန့်ထက် ဒေါ်အောင်ဆန်းစုကြည်ကို ပိုပြီးအလေးထားသည်။ ဒေါ်အောင်ဆန်းစုကြည် လာရောက်ဖူးမြော်စဉ်တွင် ဆရာတော်က တောင်ခြေသို့ သာမညတောင်ခြေသို့ဆင်းပြီး ဒေါ်အောင်ဆန်းစုကြည်ကို ကြိုဆိုခဲ့သည်။ ဒေါ်အောင်ဆန်းစုကြည်နှင့်လည်း ဓါတ်ပုံအရိုက်ခံခဲ့သည်။ ဗိုလ်ချုပ်ကြီးခင်ညွန်လာရောက်ဖူးမြော်ရာတွင် တောင်ခြေသို့ လာရောက်ကြိုဆိုခြင်း မပြုသည့်အပြင် ဓါတ်ပုံလည်း ဗိုလ်ချုပ်ကြီးခင်ညွန့်နှင့်အတူ အရိုက်မခံခဲ့ပေ။



ပျံလွန်တော်။
ခရစ်သက္ကရာဇ် ၂၀၀၃ ခုနှစ် နိုင်ဝင်ဘာလ (၂၉) ရက်နေ့ မနက် (၉)နာရီအချိန်တွင် ဆရာတော်သည် သက်တော် (၉၃) ၀ါတော် (၇၃)ဖြင့် ပျံလွန်တော်မူခဲ့သည်။ ဆရာတော်၏ ရုပ်ကလပ်ကို သာမညတောင်ပေါ်သို့ စကျင်ကျောက်ပြားဖြင့် တည်ဆောက်ထားသော ဂူဗိမာန်အခန်းအတွင်းသို့ ထဲ့ထားပြီး ကျည်ကာမှန်တံခါးဖြင့် ပိတ်ထားခဲ့သည်။ ၂၀၀၈ ခုနှစ် ဧပြီလ (၂)ရက်နေ့ ညနက် (၁၂)နာရီအချိန်တွင် ပျောက်ကျားဝတ်စုံဖြင့် အမည်မသိသည့် လက်နက်ကိုင် လူတစုက Toyota Hilux Tiger ကား(၃)စင်းဖြင့် ၀င်ရောက်ပြီး ဆရာတော်ရုပ်အလောင်းတရားဂူဗိမာန်၏ တံခါးသော့ ဓါးပြတိုက်ယူပြီး ဆရာတော်၏ ရုပ်ကလပ်ကို လုယူခဲ့သည်။



ဆရာတော် သက်ရှိထင်ရှားချိန်တွင် လာရောက်ဖူးမြော်သူများကို ပြောဆိုလေ့ရှိသော စကားမှာ “ဥုံ မပျင်းနဲ့ ခုလည်းမပျဉ်းနဲ့ နောင်လည်းမပျဉ်းနဲ” ဖြစ်သည်။


ဆရာတော်၏ ဒါကာများ ဒါယိကာမများအကြားတွင် ကောလဟလပြောဆိုကြသည့် စကားထဲ့မှ

“ဦးပဉ္စင်းမရှိရင် မင်းတို့လည်းမရှိဘူး”ဟု ဗိုလ်ချုပ်ကြီးခင်ညွန့်နှင့် သူလူတစုတွေကို ဆရာတော်က ပြောဆိုထားသည်။ ဆရာတော်ပျံလွန်ပြီး တစ်နှစ်တောင်မပြည့်သေးဘူး ဗိုလ်ချုပ်ခင်ညွန်လည်း ရာထူးမှ ထုတ်ပယ်ခံရပြီး နေအိမ်အကျယ်ချုပ် ကျခံခဲ့လေသည်။

“ရှေ့လည်းမတိုးနဲ့ နောက်လည်းမဆုတ်နဲ့” ဒေါ်အောင်ဆန်းစုကြည်လာရောက်ဖူးမြော်စဉ်က ဆရာတော်ပြောဆိုထားသည်။ ၂၀၀၃ တွင် ဒေါ်အောင်ဆန်းစုကြည်က ဒီပဲယင်းသို့ စည်းရုံးရေးခရီးထွက်သောအခါ တိုက်ခိုက်ခြင်းကို ခံခဲ့ရသည်။

“ရေစက်ချ အမျှဝေသည့်ထဲ့မှာ သန်းရွှေနှင့် မောင်အေးမပါ”ဟု ဆရာတော်က တရားနာပြီး ရေစက်ချအမျှဝေပြီးချိန်တွင် ဤသို့ ပြောလေ့ပြောထရှိသည်ဟု ဆရာတော် နှင့် နီးကပ်သည့် ဒါကာနှင့် ဒါယိကာမတို့က ပြန်ပြောပြသည်ကို သိရသည်။

ပြီး။

မှတ်ချက်။

သာမညဆရာတော်ထေရုပ္ပတ္တိအကျဉ်း (၁၊ ၂၊ ၃) ကို အောက်ပါကျမ်းများမှ ထုတ်နုတ်ပြီး ဆီလျော်အောင် ပြန်ရေးထားခြင်းဖြစ်သည်။

(၁) ဦးခွန်ချစ်သန်း ပြုစုသော “သာမညတောင် ဆရာတော်ဘုရားကြီး၏ ထေရုပ္ပတ္တိကျင့်စဉ်နှင့် ကုသိုလ်တော်များ”။ (အင်္ဂလိပ်-မြန်မာ နှစ်ဘာသာ)၊ ဘာသာရေးစာမူကြိုတင်ခွင့်ပြုချက်အမှတ် ၇၄၂/၉၉ (၁၂)။ ထိုင်းလင်းစာပေ (အမှတ် ၈/၆၅ အုပ်စု၊ အောင်သိဒ္ဓိလမ်း၊ အင်းစိန်၊ ရန်ကုန်မြို့)မှ ၂၀၀၀ ခုနှစ် ဇန္န၀ါရီလတွင် ထုတ်ဝေသည်။

(၂) ခွန်တိုးရှိန်၊ ခွန်သန်းမြင့် ပြုစုပြီး ဆရာတော်ကြီးတပည့် ဦးစန္ဒိမာ (ဓမ္မာစရိယ)တည်းဖြတ်သော “သာမညတောင် ဆရာတော် ဘ၀ဖြစ်စဉ်” ။ စာမူခွင့်ပြုချက်အမှတ် ၁၅၈/ ၉၃/ ၁၀။ ရွှေပုရပိုက်စာပေ (၅/တင့်ဆန်းလမ်း၊ ဂွတ္တလစ်၊ ရန်ကုန်မြို့)မှ ၁၉၉၃ ခုနှစ် နိုဝင်ဘာလတွင် ဒုတိယအကြိမ် ထုတ်ဝေသည်။

(၃) ဦးခွန်ဥာဏ်ဦး (ဓမ္မိက) ပြုစုသော “အလံတစ်ရာစေတီတော် နှစ် (၅၀)ပြည့်ရွှေရတု မင်္ဂလာအထိမ်းအမှတ်၏ ရွှေရတုလက်ဆောင် ဆောင်းပါးများ” (၁၉၅၃-၂၀၀၃)။ ဘာသာရေးဆိုင်ရာ စာမူခွင့်ပြုချက် အမှတ် (၀၄၆)။ ချိုတေးသံစာပေ (ရွှေနံ့သာကျေးရွာ၊ ပုလဲမြို့(၃)၊ မင်္ဂလာဒုံ)မှ ထုတ်ဝေသည်။

(၄) ဇွဲကပင်ဝက်ဆိုက်မှ 2009 December 29 တွင် တင်ထားသော “တတိယအိုအေစစ်” ခေါင်းစဉ်ဖြင့် မယ်တော်ဆေးခန်း၏ အနှစ်(၂၀) အထိမ်းအမှတ်မှ အမျိုးသားဒီမိုကရေစီအဖွဲ့ချုပ် သထုံမဲဆန္ဒနယ် ပြည်သူ့လွှတ်တော်ကိုယ်စားလှယ် ခွန်မြင့်ထွန်း (NCGUB အလုပ်သမားရေးရာဝန်ကြီး) ၏ ဂုဏ်ပြုမိန့်ခွန်းကို အခြေခံထားသော ဆောင်းပါး။

(၅) အလံတစ်ရာ၊ ကော့ကျိုက်၊ ထီလုံ၊ ၀င်းစိန် စသည့်ကျေးရွာများမှ သာမညဆရာတော်၏ ဒါကာ ဒါယိကာမများနှင့် ထိုင်းနိုင်ငံတွင် တရားမ၀င် အလုပ်လုပ်ရာမှ ဖမ်းဆီးခြင်းခံရပြီး မဲဆောက်-မြ၀တီသို့ ပြန်ပို့ခံရ၍ နှစ်နိုင်ငံနယ်စပ်တွင် သောင်တင်စဉ် သာမညဆရာတော် ကယ်ဖူးခဲ့သည် ဟိုပုံးမြို့ တောင်ရပ်မှနေထိုင်သည့် ငယ်သူငယ်ချင်းများ၏ ပြန်ပြောပြချက်များ။

0 comments